ठाणे : ठाणे महानगरपालिका व ठाणे जिल्हा अॅथलेटिक्स असोसिएशनच्या वतीने १३ ऑगस्ट रोजी होणाऱ्या ‘ठाणे महापौर वर्षा मॅरेथॉन’ स्पर्धेच्या कार्यालयाचे उद्घाटन महापौर मीनाक्षी राजेंद्र शिंदे यांच्या हस्ते झाले. स्पर्धेसाठी स्पर्धकांना नोंदणी करता यावी, तसेच स्पर्धेबाबत मार्गदर्शन मिळावे, यासाठी ठाणे महानगरपालिकेतील धर्मवीर आनंद दिघे सभागृहात मॅरेथॉन कार्यालय सुरू करण्यात आले आहे.

या वेळी उपमहापौर रमाकांत मढवी, सभागृह नेते नरेश म्हस्के, विरोधी पक्षनेते मिलिंद पाटील, शिवसेना गटनेते दिलीप बारटक्के, नगरसेवक सुधीर कोकाटे, उमेश पाटील, सिद्धार्थ ओवळेकर, नरेंद्र सूरकर, गुरमुखसिंग स्यान, योगेश जानकर, उपायुक्त संदीप माळवी, अशोक बुरपल्ले, क्रीडा अधिकारी मीनल पालांडे, ठाणे जिल्हा अॅथलेटिक्स असोसिएशनचे उपाध्यक्ष सचिव अशोक आहेर, सदस्य एकनाथ पवळे, विजय कुलकर्णी आदी उपस्थित होते.

ठाणे महापौर वर्षा मॅरेथॉन स्पर्धेसाठी मुंबई-ठाण्यातीलच नव्हे, तर महाराष्ट्रातून अनेक स्पर्धक सहभागी होत असतात. त्याचप्रमाणे ‘आर्मी’मधील नामवंत खेळाडू सहभागी होत असतात. स्पर्धेत सहभागी होणाऱ्या स्पर्धकांना मॅरेथॉन स्पर्धेची संपूर्ण माहिती मिळावी, तसेच स्पर्धेचे प्रवेश अर्ज, चेस्ट नंबर आदी आनुषंगिक कामांची पूर्तता करता यावी, यासाठी मॅरेथॉनचे कार्यालय सुरू करण्यात आले आहे.

‘ठाणे महापौर वर्षा मॅरेथॉन’ स्पर्धेत जिल्ह्यातील शालेय विद्यार्थी मोठ्या संख्येने सहभागी होणार आहे. स्पर्धकांची नोंद करता यावी, तसेच स्पर्धकांना माहिती मिळावी व संपर्क साधता यावा यासाठी हे कार्यालय सुरू करण्यात आले आहे. ठाणे महापालिका, ठाणे जिल्हा अॅथलेटिक्स संघटना यांच्या संयुक्त विद्यमाने होणाऱ्या या स्पर्धेबाबतच्या बैठकाही या कार्यालयात होणार आहेत. शालेय विद्यार्थ्यांपासून ज्येष्ठ नागरिकांपर्यंत अशा विविध नऊ गटांत ही स्पर्धा होणार आहे. तसेच यंदा पारसिकनगर खारेगाव ते महापालिका भवन ही १० किलोमीटरची आणखी एक मॅरेथॉन होणार असून, प्रत्येक स्पर्धकाची नोंद या कार्यालयात ठेवण्यात येणार आहे. या स्पर्धेत मोठ्या संख्येने सहभागी व्हावे, असे आवाहन महापौर मीनाक्षी शिंदे यांनी या वेळी केले.